شعر / الصافى عبدالله
( حكايتنا )
حكايتنا أنا وانتى هتبقى تاريخ
ذكرى باقية بعدينا هيحكيها الشباب تفاريح
ومش هتروح
عشان عمرى ما كنت ابدا
بقول فى كلام على الفاضى يكون تباريح
ردى وقولى على قولى
ده انا قولى ليكى إنتى من قلبى
وطول عمره أنا قلبى فى قوله صريح
بحبك أيوه من قلبى
وحبك رحلتى وعمرى
جواز سفرى فى بحر عينيكى على شطك
لما أوصل يكون تصريح
أكيد هوصل أنا ليكى مش هرجع
ولو هدت قلوعى الريح
هجيلك عوم ولو هوصل أنا غرقان
على رملك يكون كفنى
وضمة أرضك الغالية دى قبر مريح
حكايتنا أنا وإنتى هتبقى تاريخ
تم نسخ الرابط بنجاح!
