محمود فرج يكتب .. كنت مدخناً !!

متعصب هشرب سيجارة علشان اهدى ولو مبسوط دي بقى محتاجه سيجارة، عندي اجتماع او بفكر في حاجة جديدة ومتوتر أكيد لاز سيجارة، وعلى ده الحال لسه صاحي لازم ابدء يومي بسيجارة وكوباية شاي بعد الاكل مع كوباية القهوة طول الوقت، السيجارة بقت جزء لايتجزء من كل حاجة واي حاجة بقت مرتبطة بكل العادات اليومية وبالتالي بقيت متأكد من جواك انك عمرك ما هتبطل تدخين.
أنا كمان كنت زيك كدة بالظبط لحد لما قررت ابطل تدخين، بس ايوة زي ما جه في بالك بالظبط هبطل وهرجع تاني زي ما ياما حصل معاك كتير، بس المرة دي انا هقولك ايه اللي خلاني ان شاءالله عمري ما ارجع تاني، في الاول انت ليه بقيت مدخن هتلاقي والدك أو المدرس اللي كنت بتحبه وانت صغير وواخده قدوة ليك أو الممثل المشهور اللي دايما طالع في كل الادوار صايع وقوي ومحدش بيقدر عليه لازم السيجارة تكون في ايده، بقت السيجارة دليل على القوة والرجولة، انت متخيل ان حته البتاعة دي اللي بتذلك ومورياك الويل بقت دليل على القوة.
مع ان الواقع ان القوة الحقيقية هي في السيطرة على نفسك من اي شهوة مثل الساجير وغيرها، وبعدين الاصعب من كل ده انك طول الوقت بتشتكي ان عندك ضائقة مالية بس لما علبت السجاير بتخلص الفلوس بتتوجد في اللحظة دي بمنتهى السهولة، تخيل انت عامل في نفسك كل ده مزنوق ماديا ريحتك طوال الوقت مش حلوة، دايما مودك وحش غير انك بتلعب رهان خسران على صحتك، يعني معادلة خسرانه بكل الاشكال.
انا حسبتها من كل النواحي وقررت احافظ على اهلي وحبايبي قررت اكون قدوة صالحة بجد مش شعارات وخلاص، ومش بس كدة الفلوس اللي كنت بصرفها على السجاير قررت اكافئ نفسي بها، كل عشر ايام بحسب الفلوس اللي بتتصرف على السجاير واكافئ نفسي بهدوم جديدة سفرية او خروجة حلوة، حاجات كتير كنت ممكن تكون حارم نفسك منها بسبب علبة سجاير، خد انت كمان القرار وهتلاقيك كسبان من كل النواحي خليك قدوة بجد للي حواليك، وخليك فخور بنفسك لانك فعلا مش ضعيف انت تقدر تاخد القرار