جبتك ياعبد المعين..!

آخر كلام
بقلم:الكاتب الصحفى الكبير /  محسن حسنين

بعدما قالت وزيرة التخطيط إن الحكومة محتاجة فلوس زى ما الناس محتاجة فلوس..!!
أنا شايف إن محدودى الدخل وبتوع المعاشات ،اللى بيكحوا تراب، يعملوا جمعية عند الست “أم دقدق”..ويقبضوها الأول.. ويتبرعوا بها لحكومتنا الغلبانة..!!
هو دا اللى ناقص..!

# الشعب والحكومة ..مين شغال عند مين..؟!
اللى حارق دمى فى كلام وزيرة التخطيط إنها إمتداد لسلسلة تصريحات مستفزة لوزراء حاليين وسابقين فى حكومة مدبولى بتؤكد نظرتهم المتعالية للشعب..على إعتبار إن الحكومة هى ماما وبابا وأنور وجدى..!

كل تلك التصريحات المستفزة للوزراء تجعلنا نتساءل : مين بيشتغل عند مين..؟!
أنا طبعا مش ها أجاوب ،كالعادة، علشان ما أغلطش ..ومصيبتى السودا إنى ساعة الغلط با أطرطش زلط..!

# منين بيودى على فين..؟!
التحركات الغريبة التى تحدث فى العالم الآن تؤكد أن التحالفات التقليدية القديمة كانت موضة وبطلت ،وأن هناك تحالفات جديدة لنج حولت أصدقاء الأمس إلى أعداء اليوم.. وبالعكس ..والكل بيهدد بالحرب..!
وبقى الواحد متلخبط ومش عارف راسه من رجليه.. هو رايح وللا جاى.. ومين مع مين.. ومين ضد مين..ومنين بيودى على فين..!
يعنى زى المطرب عبد الباسط حمودة مابيقول : “أنا مش عارفنى أنا تهت منى ..أنا مش أنا.. لا دى ملامحى ولا دا شكلى ولا دا أنا.. أبص لروحى فجأة..لقيتنى تعبت من المفاجأة ونزلت دمعتى.. تكونش دى نهايتى وآخر قصتى”..!!
ربنا يستر..ياعم عبد الباسط..!

# سكتوا ليه..؟!
أنا قلقان جدا.. فقد مرت نص ساعة بحالها دون أن نسمع وصلات الردح المتبادلة بين زعماء أوروبا والرئيس الأمريكى.. خير..اللهم إجعله خيرا..!
# وأنا أتابع ماتفعله بعض الدول العربية الشقيقة لا أجد ما أقوله إلا أن أدعو الله عز وجل أن يحمى مصر من أشقائها.. أما أعدائها فهى كفيلة بهم..!

# مصر تستحق عن جدارة تصدر قائمة أكثر دول العالم إصدارا للفتاوى ..!!
فالكل بيهبد .. وبيفتى ..وجنرالات القهاوى أصبحوا أكتر من الهم على القلب و”بيفتوا على روحهم” فى كل حاجة : فى الدين والكورة والحرب والسلام والسياسة والإقتصاد والتاريخ والجغرافيا.. وكافة شىء..!
أنا دلوقت عرفت ليه الأدوية بتاعة الإسهال إختفت من السوق..!
# بسبوسة التجمع الخامس..!!
# إيه الحكاية ياجماعة.. فى أقل من أسبوع واحد.. إنهيارات أرضية وإنفجار مواسير رئيسية فى التجمع الخامس..؟!!
يبدو إن اللى بنى مصر كان فى الأصل حلوانى آه .. لكن اللى بنى التجمع كان فى الأصل حلوانى برضه.. بس تخصص بسبوسة..لامؤاخذة..!!